Pamfir

Pamfir (Yuki̱ren: Памфір) yet fim kidee fikshon Yuki̱ren hwa nang á̱ ghwut ma̱ng a̱nhu ma̱ a̱lyia̱ 2022 a̱ni nang Dmytro Sukholytkyy-Sobchuk wa ku yet a̱kwak a̱son maat wu, a̱wot á̱ si̱ tsa tyai swanta ndyo a̱tuk mam 22 Zwat Tswuon ma̱ a̱lyia̱ 2022, ma̱ a̱yet Festival de Cannes a̱kpa̱k 75 wu, mi̱ di̱ khai Nsati Nfeang A̱kwak-a̱son a̱kpa̱k 54 hu. Á̱ ka̱u ma̱ a̱byin Yuki̱ren neet ma̱ a̱tuk mam 23 mi̱ Zwat Tsat 23 a̱lyia̱ 2023. Kyiak neet ma̱ a̱tuk mam 22 Zwat A̱taa a̱leang, á̱ yuut fim hu naat ndyo mi̱ Netflix. Fim hu ku san a̱tsak za̱nang A̱yet Bibyin Swanta Kairo ji, A̱gba̱ndang Za̱nang A̱yet Fim Bibyin Swanta Kyip wu nang á̱ ngyei Molodis a̱ni, ku si̱ shyia̱ a̱yaayet fim bibyin swanta ma̱ a̱di̱di̱t. The Guardian ku tyia̱ a̱lyoot Pamfir mami nfim 2023 na swak di̱ yet a̱ni.

Pamfir

fiction film

Title	Памфір
Genre	drama film
A̱byin neet	Yuki̱ren, Poland, Fi̱ransa (a̱byin), Chile
A̱tsak a̱lyem fim ku shei TV huni	Ukrainian
A̱tuk nshei	2022
A̱kwak a̱son	Dmytro Sukholytkyy-Sobchuk
A̱tyulyuut nkhang	Dmytro Sukholytkyy-Sobchuk
Cast member	Olena Khokhlatkina, Ivan Sharan
A̱sa̱khwot	color
Nominated for	European Film Award for European Discovery of the Year
CNC film rating (France)	no age restriction, warning

Oleksandr Yatsentiuk wa ku yet a̱gwak mi̱ fim hu. Á̱ ku maat fim hu a̱zaghyi ma̱ng zwang ji nang Roshya bai Yuki̱ren ndyo a̱ni, a̱wot ku si̱ yet nyiung mami nvak vwuot taada nyian-ghwughwu na̱ swak ma̱ng yet a̱tsatsak a̱ni tazwa Yuki̱ren a̱fwun – tangka̱i tswa nang á̱ si̱ mi̱n but ghyuai a̱ni ma̱ng cat swuan.

Khwom

A̱gwak maat wu mi̱ fim hu, Pamfir, yet a̱tyu tswuam nwuai ma̱ng nkyang bai a̱byin gbangbang wa, a̱wot a̱ yet a̱cucuk a̱tyoli a̱ byia̱ kyangbwak wa a̱nyan wa ku bwuok a̱ bai a̱bakeang nggu ka di̱ fam jenshyung Yuki̱ren a̱ swan a̱ja, lilyim ndyia̱ ma̱ a̱di̱di̱t nang gu ku nyia̱ ta̱m ma̱ a̱byin nta a̱ni. A̱ si̱ ba̱ kyiak yong nyia̱ kyiak neet ma̱nini, da̱ nggu, a̱ na ka nnyia̱ a̱tan ta̱m wa a̱ shyia̱ kyang ya ma̱ng swuo nggu, mat a̱nia wa a̱ na si̱ ngyet a̱tan kidee ma̱ a̱ghyi a̱fai nggu wu Nazar. Nyiá̱ ji ku nyia̱ mi̱ Bukovina wa ma̱ a̱tyetuk a̱yet taada Malanka ka. A̱wot di̱ fam-a̱byin hu, za̱kwa byian ja nhyat koji, a̱wot bwoi a̱ka̱bun ma̱ng khwi si̱ byia̱ a̱ka̱ta ma̱ng a̱ghyang. Orest Ivanovych Mordovskiy wa ku yet kwak a̱son a̱ka̱bun nang á̱ khwom á̱ sak á̱ bwoi a̱ni, á̱ bu ngyei nggu Morda (Mug), a̱nyan wa ku ki yet a̱kwak a̱son ka̱mpa̱ni cok sop mali jhyang. A̱cucuk khwom Pamfir si̱ nwai tyia̱ mat kyang ghyang ku shyia̱ a̱fai nggu wu a̱ni: Nazar ku cat sak a̱tyia̱ nggu a̱mali ma̱nang gu kai long tazwa ndokyumen nggu na, a̱wot ma̱ng nna, di̱ mi̱n lyen, mali naai a̱bakeang ka na mun fwui. Ma̱ninika, ku si̱ yet ta hwa Pamfir gu bwuok tangka̱i a̱byia̱byia̱ nyia̱ gbangbang nggu hu mat gu tan byian hu, a̱ si̱ bwuok nwuo bwoi a̱ka̱bun, a̱ si̱si̱ yet memba sot bwoi a̱ka̱bun jhyang a̱ si̱ bu ta̱bat nyia̱ ta̱m tswuam nwuai ma̱ng nkyang bai a̱byin.

Á̱nietvwuomaat

• Oleksandr Yatsentiuk – Leonid (Pamfir)
• Stanislav Potiak – Nazar, a̱fai Leonid
• Solomiya Kyrylova – Olena, a̱kyuo Leonid
• Olena Khokhlatkina – a̱yang Leonid
• Myroslav Makoviychuk – a̱tyia̱ Leonid
• Ivan Sharan – Viktor, a̱shishyuo Leonid
• Oleksandr Yarema – Orest (Morda)
• Andriy Kyrylchuk – Bobul, nggwonshan
• Ihor Danchuk – pato Andriy
• Petro Chychuk – Vasyl, renja
• Vitaliy Boyuk – Kolya, a̱hyaai
• Oleksandr Boyuk – Tolya, a̱hyaai
• Kateryna Tysiak – Anhelina
• Viktor Baranovskiy – Shchur
• Halyna Sviata – a̱cok gak-a̱byin
• Heorhiy Povolotskiy – Bison, a̱cok gak-a̱byin
• Oleksiy Leybiuk – Akela
• Volodymyr Lyutikov – a̱cok gak-a̱byin
• Vitaliy Koval – Petro, a̱cok gak-a̱byin
• Zinoviy Symchych – pris
• Ihor Demyanyuk
• Rymma Zyubina – a̱tyulyiat mi̱ TV