Hyaai á̱niet ma̱ng wum a̱ka̱sa ku naat á̱ mbwuot ma̱ a̱byin A̱tyap a̱ni
Hyaai á̱niet ma̱ng wum a̱ka̱sa ku naat á̱ mbwuot ma̱ a̱byin A̱tyap a̱ni. Ka̱ nyi bwung bah, á̱ kyiak mmam na̱ bai swak a̱ni a̱fwun di̱ hyaai á̱niet ma̱ng wum a̱ka̱sa ma̱ a̱bakeang ma̱ a̱di̱dit mi̱ fam a̱byin A̱tyap ku shyia̱ Nietcen A̱fakan (Kpat: Zango) a̱ni. Á̱ fa nyia̱ á̱niet cok nyák á̱ ngyei A̱fa̱taa a̱ni bibya nyian a̱byia̱byia̱ nta̱m ya a̱lyia̱ ma̱ng fwuo na a̱ni.
| A̱byin | Naijeriya  |
|---|---|
| A̱vwuo | Nietcen A̱fakan, A̱byintyok A̱tyap |
A̱tyoli Gwanzwang a̱nyan wa shyia̱ ma̱ng swat hu Matyei ku tak nang á̱ ku mbai ma̱ng A̱fa̱taa ba mi̱ a̱yaama̱to bya á̱ ba̱ koot ma̱ a̱keang ka. Gwanzwang yet a̱tyu Matyei wa, byin Matyei meang. Mi̱ nkhang gu bwoi nzi̱t ndyo a̱ni, a̱ ku tak nang á̱niet ba ku nkhwi a̱yaatoot A̱khwot Á̱kwop Naijeriya bya. Á̱niet Matyei ba ma̱ng A̱buyap dam nang A̱khwot Á̱kwop Naijeriya mbyia̱ bwak di̱ hyaai á̱niet ma̱ng wum a̱ka̱vwuo na. A̱ka̱keang á̱ wum di̱n mmam swak na̱ swak a̱ni na bai cyi sweang ma̱ng kyang. Á̱niet ba̱ shyia̱ ma̱ng swat ma̱ a̱byin A̱tyap ka di̱ yong huni dam nyia̱ nyiá̱ jini tyia̱ á̱ si̱ hyaai á̱niet ba̱ swak nswak ntat a̱ni.
A̱baka̱keang á̱ nyia̱ nyiá̱ jini a̱ni ni̱nia yet: Warkan, Maka̱ra̱u, Matyei, A̱bwuiyap, A̱takligan (Kpat: Magamiya), Tya̱caat (Kpat: Kacecere) ma̱ng á̱ghyang ba.
Á̱ dam nyia̱ hyat a̱fai Maka̱ra̱u A̱kpat wu ku faat fi̱faat nang Kaswuo Nietcen A̱fakan ji A̱tuk Juma (9 Zwat A̱natat 2021) hyia̱ nang A̱kpat wu mbyia̱ bwak mi̱ nkyang na̱ naat á̱ mbwuot a̱ni. Ma̱ninika n dyiat a̱ni, á̱niet a̱ka̱cyet cat kai vak Nietcen A̱fakan hu bah. A̱wun ta̱bat konyan, Á̱niet Khwi Kristi ba ma̱ng Á̱niet Kpa Pyipyia̱ a̱byin meang.
Ka̱ doot a̱yin gu dam nyia̱ á̱niet ba̱ shyia̱ di̱n tyok Naijeriya hu a̱fwun a̱ni cat zi̱ swan swat nyinyang ma̱ng a̱ghyang nzit bah. Ba̱ shei kpa̱sai nang ba̱ nvwuoi A̱fa̱taa cok nyák ba a̱ni ndyang da̱nian a̱lyiat ba̱ lyiat kuzang mam a̱ni.
Ma̱ninika, ma̱ng A̱gwaza Tswazwa wa zi̱ ta a̱zanson gu beang nzi̱t ma̱ a̱byin A̱tyap ka a̱mgba̱m.
Ya̱fang
jhyukA̱tyulyuut: A̱tyoli Zwandien Bobai (13 Zwat A̱natat 2021).