Andrew Yakubu

Andrew Laah Yakubu ku Andy Yakubu ku A̱nda̱rawut Laah Yakubu (á̱ byin nggu a̱tuk 10 Zwat A̱kubunyiung 1955), nggu wa ku yet a̱khwukhwop a̱kwak a̱son nang a̱ ngyei Group Managing Director Nigeria National Petroleum Corporation wu a̱ni. A̱khwukhwop a̱tyu ba̱ng tyok a̱byin Naijeriya wu, Goodluck Ebele Jonathan wa nwuak nggu tyok hu mami a̱lyia 2012 di̱n jen ji nang gu ni̱ ntyai maai nggu hu mat lyen ta̱m nggu hu neet ma̱ a̱ka̱vwuo ma̱ a̱di̱di̱t a̱ni. Nggu A̱tyoli A̱nda̱rawut Yakubu ba̱ng tyok huni neet di̱n jen a̱ja si̱ nat a̱lyia̱ 2014 a̱wot a̱ si̱ wot ta̱m hu dundung ma̱ng á̱nietnta̱m nggu á̱ghyang. Nggu A̱tyoli Joseph Dawha wa si̱ san tyok hu mbwak A̱tyoli A̱nda̱rawut Yakubu ka. Di̱ yong huni, Yakubu wa ba̱ng tyok yet Iya A̱tyap hu ma̱ A̱byintyok A̱tyap ka a̱ni mami Si̱tet Ka̱duna, Naijeriya.

Andrew Yakubu Laah

a̱tyubishyi

Sot mbyin	a̱sam
A̱byin mbyin	Naijeriya
A̱lyoot nang á̱ ku tyia̱ nggu	Andrew
A̱tuk mbyin	10 Zwat A̱kubunyiung 1955
Lilyem a̱ lyen lyiat, lyuut ku tyia̱ bwak ma̱ng a̱nhu a̱ni	Shong, Nigerian Pidgin
Ta̱m	chemical engineer
A̱ ku nat fang hu ma̱	Yunuvasi̱ti Ahmadu Bello

Nkhang shyicet

Á̱ byin Yakubu ma̱ a̱tuk mam 10 kya mi̱ Zwat A̱kubunyiung ma̱ a̱lyia̱ 1955, ma̱ a̱bakeang Mawukili, Fam A̱za (a̱fwun a̱tak Si̱tet Ka̱duna), Naijeriya. Nggu Yakubu yet a̱tyucat á̱niet wa ba̱t, a̱wot a̱ si̱ bu shyia̱ ma̱ng fwuo cat beang á̱niet da̱ a̱ka̱vwuo ma̱ a̱di̱di̱t a̱ si̱ bu beang á̱kunak a̱nciri̱ng mbeang a̱ka̱vwuo khwi mbeang cat tyei á̱niet mi̱ nta̱m ma̱ a̱byin Naijeriya ka a̱mgba̱m. Ndyia̱ ma̱ a̱di̱di̱t na̱ swak a̱ni, nggu A̱tyoli Anda̱rawut ku beang á̱kunak ma̱ng a̱nyiuk sang á̱tyok ma̱ a̱di̱di̱t ma̱ a̱byin Naijeriya ka a̱mgbam. Iya A̱tyap beang mman di̱ naat fang ma̱ng a̱ka̱kurum a̱wot a̱ si̱ bu beang a̱nyiuk ma̱ng á̱niet a̱bwuang ma̱ng a̱ka̱kurum fi̱ng a̱bwuang mba na di̱n vak sotbeang ji á̱ ngyei Maryamu and Yakubu Foundation a̱ni.

Tat-a̱pyia̱

Yakubu ku nat fang mi̱ Government College ma̱ a̱keang Kefi ma̱ a̱lyia̱ 1969 si̱ nat a̱lyia̱ 1973, a̱ja wa gu nshyia̱ ya West African School Certificate. A̱ doot a̱ja, a̱ si̱ ya a̱son ma̱ng fang hu mi̱ College of Arts and Science mami Zariya ba̱ng si̱ nat a̱lyia̱ 1975, di̱n jen gu ni̱ nshyia̱ nwuo nat fang mi̱ Yunuvasi̱ti Ahmadu Bello a̱ni, a̱ja wa gu si̱ nfang Bwokntswam Kemikat hu nang gu tyia̱ fwuo nggu gu ngyet a̱bwokntswam wu a̱fwun a̱ni. Di̱n jen nang gu ni̱ ntyak fang hu a̱wot a̱ si̱ shyia̱ yaa BA ma̱ a̱lyia̱ 1979 a̱ni, di̱n jen a̱ja ja gu ngya a̱son ma̱ng ta̱m da̱ a̱ka̱vwuo ma̱ a̱di̱di̱t mi̱ a̱yaari̱fainari a̱wot a̱ sii ba̱ nshyia̱ yet Executive Director of Operations mi̱ NETCO mi̱ Zwat Tsat 2005. Bu mbeang kyang mami fang nggu ka mi̱ Kemisi̱ti̱ri, a̱ si̱ bu shyia̱ yaa kwaa̱mbwat mi̱ Strategy and Organization da̱ a̱gba̱ndang a̱vwuofang Stanford University's Graduate School of Business Studies.