Robinson O. Robinson

Robinson O. Robinson (13 Zwat Tsat 1940 – 29 Zwat Jhyiung 2019) wa ku yet Eze Ekpeye Logbo (A̱gwam A̱kpeye A̱mgba̱m) a̱feang A̱byintyok A̱kpeye ka, ka̱ shyia̱ A̱hoda A̱tyin ma̱ng nkap A̱hoda Jenshyung, Si̱tet Rivat, Naijeriya. Nggu wa ku yet a̱son a̱kpangcuk Kansi̱t Á̱gwam Si̱tet Rivat. Ma̱nang gu sii du khwu a̱ni, Eze Kevin Nggozi Anugwo si̱ nyeak cuk ji nang Eze Ekpeye Logbo III mi̱ Zwat Tswuon a̱lyia̱ 2022.

Robinson O. Robinson

a̱tyubishyi

Sot mbyin	a̱sam
A̱byin mbyin	Naijeriya
A̱lyoot nang á̱ ku tyia̱ nggu	Robinson
Ta̱m	military officer, a̱gwam

Shyicet ma̱ng a̱kariya

Á̱ ku byin Robinson a̱tuk mam 13 Zwat Tsat a̱lyia̱ 1940 mi̱ Odiereke-Ubie, Fam A̱tak, Naijeriya Bi̱ri̱ti̱n (ma̱nini A̱hoda Jenshyung, Si̱tet Rivat, Naijeriya) mi̱ kyangbwak Khwiki̱risi̱ti. A̱ nwuo ma̱ A̱khwot A̱kwop A̱byin Naijeriya wu nang gu ku ngyet ndyia̱ 16. A̱wot a̱ja, a̱ si̱ nyia̱ ta̱m di̱ Reconnaissance Squadron, Ka̱duna, Sot-nta̱m Garrison Legwot ma̱ng Depot Odinan si̱ A̱khwot Á̱kwop A̱byin Naijeriya, Legwot. Ma̱ a̱lyia̱ 1966, á̱ si̱ shyei nggu á̱ nat A̱khwot A̱kwop Tswazwa Naijeriya wu, ndyia̱ a̱feang nang á̱ sii du kpaat nggu a̱ni. A̱ja̱u, a̱ si̱ nyia̱ ta̱m nang a̱tyubeang-a̱pyia̱ George T. Kurubo, a̱son a̱tyu Naijeriya a̱ yet A̱gba̱ndang A̱kwak-a̱son A̱khwot Á̱kwop Tswazwa Naijeriya wu a̱ni.A̱ si̱si̱ ngyet a̱tyu yong lilyim gwomna a̱khwot a̱kwop Si̱tet Pi̱lato wu, Dan Suleiman. A̱ sii du nyia̱ ta̱m A̱malifang Kwak-a̱son A̱khwot A̱kwop Tswazwa Naijeriya ka ma̱ a̱keang Pa̱takwot nang a̱tyutyiet a̱ni. Mi̱ Zwat Swak ma̱ng Jhyiung a̱lyia̱ 1979, a̱ si̱ shim ma̱ng a̱pyia̱ nggu gu kai ta̱m A̱khwot A̱kwop Tswazwa Naijeriya hu a̱ ghwon nang gu byia̱ shi flight lieutenant a̱ni.

Shyicet a̱pyia̱

Ma̱ a̱lyia̱ 1970, Robinson si̱ bwuo Felicia Funmilayo, a̱nap A̱kpeye nang á̱ byin Legwot a̱ni a̱ si̱ yet ndyia̱ 19 ma̱nang gu ni̱ nshyia̱ di̱ nyia̱ ta̱m a̱khwot a̱kwop hu.

Tyok

Ma̱nang Eze Ekpeye Logbo I wu, A̱gwam Edmund Unoshi Ashirim a̱si̱ Ihuaba ma̱ a̱byintyok Upata sii du khwu a̱ni (A̱byintyok A̱kpeye ka byia̱ bibyintyok ntat hwa ku yet kap nka a̱ni) ma̱ a̱lyia̱ 1977, á̱ si̱ kpaat komiti á̱niet a̱fwuon da̱nian á̱ ka zop á̱ cat a̱gwam ntung A̱kpeye wu neet a̱malityok a̱byintyok Ubie ka. Tswak ji si̱si̱ nkwa da̱ a̱pyia̱ Robinson. Ma̱ a̱lyia̱ 1979, a̱ si̱ shim yei hu a̱ si̱ nyeak cuktyok a̱byintyok A̱kpeye ji nang a̱gwam, a̱wot a̱ si̱ kin kai ta̱m a̱khwot a̱kwop hu a̱ ghwon, á̱ si̱ ta̱bat yei nggu ma̱ng a̱lyoot ntyok ka, Eze Ekpeye Logbo II. Ma̱ a̱lyia̱ 1983, á̱ nwuan á̱ si̱ li nggu á̱ si̱ tyia̱ nggu gu yet a̱son a̱kpangcuk Kansi̱t Á̱gwam Si̱tet Rivat ka.

Ma̱ a̱lyia̱ 2013, nggu, mbeang á̱niet kansi̱t á̱gwam nggu ba si̱ nang a̱bombwuon a̱nu tazwa á̱niet a̱byin A̱kpeye ba á̱ ku khai a̱ni ma̱ a̱gwomna̱ti ba nang ba̱ nwai nyia̱ kyang tswa a̱ni kang ma̱ng byian nkyang.

Za̱náng

Jen ji nang gu ni̱ nshyia̱ ma̱ng swuan a̱ni, Robinson ku san za̱náng cyin Commander of the Order of the Niger (CON) mbwak a̱gwomna̱ti Naijeriya ba.

Kwi

A̱ saan a̱tuk mam 29 Zwat Jhyiung a̱lyia̱ 2019, nang gu sii du nyia̱ ma̱ng a̱banzwan a̱ni. Á̱ si̱ niat nggu a̱malityok nggu ka ma̱ a̱keang Obiereke-Ubie a̱tuk mam 13 Zwat Tswuon a̱lyia̱ 2019.